Florida 2008 - Part I

also, ich daenkt, ich schrib do doch mol mi erschte itrag, fuer alli wo keis livejournal hei und drum mini updates doert nid choenne laese, aber trotzdaem bitz interessiert si.

also, ich bi jo am 9/11 abgfloge: basel > london heathrow > miami > tampa
2 1/2 stund han i bruct, bis is dur d passport security gsi bi und mis gepaeck uss- und wider icheckt ha. sehr muehsam! also an dr eigentliche security han i nid mol e minute brucht, eifach s astoh isch e seich. und s formular ussfuelle. und die uebellunige flughafeagstellte. nu item, ich bi also problemlos inecho und dr taxifahrer hett au d monte carlo towers sofort gfunde. ich bi immer no chli gschockt ab daem ganze luxus do und ich schaem mi ehrlich gseit jetzt au grad bitz waege minere eigene wohnig. wieso? ich cha do derzue eigentlich nur dr link zu mim flickr account mit de foeteli geh.

ich bi saumued acho und drum au zimlich direkt go schlofe. am morge bin i denn us em badzimmer cho und offebar in die falsch richtig abboge, will ploetzlich bin i imene voellig unbekannte zimmer gstande - im schlofzimmer naemlich. uebernachtet han i ebe im gaestezimmer/buero, ha das aber nid gmerkt. jaenu, s bett isch bequem und s zimmer schoen, drum han i beschlosse, ich muess jo nid das andere bett au no asuelche.

am frittig han i nid so vill gmacht. d jane, e anderi bewohnerin vo daem luxus-komplex, hett mi ummegfuehrt und mir alles zeigt: pool, garage, fitnessruum, tennisplaetz usw. denn bin i go ichaufe in s e organic grocery store und ha mi bitz em ken vom security desk [=reception] unterhalte. si also alles sehr uffgstellti luett.

denn han i latuernich no muesse mit dr jenn abmache, wenn und wo mir eus am naechste tag wei traeffe. d jenn kenn ich vom livejournal.com und sie wohnt in venice. sie isch freiwillige mitarbeiter vom mote marine center in sarasota und goht 2x in dr wuche uff sogenannti turte walks, immer am mi und am sa morge frueh. ich bi also am 4i uffgstande und mit em auto nach venice gfahre. doert han ich sie und ihri mueter troffe. mir si denn an strand gfahre und hei doert gluegt, was es neus geh hett. offebar hett dr hurricane ike zimlich vill sand vom meeresbode abtreit und an strand befoerderet. jetzt isc s ufer hoecher und es paar schildchrottenaeschter hei muesse verschobe waerde. usserdaem hett's dorum au ganz vill zuegs an strand gschwemmt. ich ha sau vill muschle, koralle und seeigel gfunde. und will das jo schwemmguet isch, doerf me das au mitneh. nochhaer hett si mi zumene andere strand gfahre, wo w fluss muendet und me ame seekueh und delfin gseht. mir hei aber nur reiher, falke und pelikan gseh, isch aber trotzdaem suuupi gsi.

nochhaer simmer go zmorge aesse ins mcdonald's und go warte bis d leade am 9i uffgoenge, denn bitz shopping gmacht in dr touriste-meile und denn ins mote marine cente gfahre. doert han ich gratis ine doerfe, will jo ebe d jenn fuer die schafft. s isc also sehr interessant gsi. mir hei e film ueber hei gluegt und ich ha sogar roche doerfe strichle. die hei doert so e spezielle touch tank, wo sich die fisch au choenne zruggzieh. aber das hei si gar nid welle. die hei richtig welle gstrichlet waerde vo allne. und denn han i no sau vill gaeld im souvenirshop und im spaendekaesseli lo ligge...

mir si denn witters go zmittag aesse und nochhaer in myakka river state park. dasch verglichbar mit eme nationalpark. me zahlt a igang 5 $ und fahrt denn mit em auto ine. denn cha me ueberall ahalte wo me will und uff so spezielle trails rundgaeng laufe. me muess ganz ruehig si, denn gseht me allergattig tier. mir hei fisch, kraulquaeppli, voegel und alligatore gseh. spoeter s denn au no e wildsau, e woeschbaer und reh ufftaucht. dr woeschbar isch leider schnaeller gsi als ich mit dr kamera, drum han i v daem keis foeteli. s isch also alles super gmacht doert, und wenn mir nid erscht am 4i ufftaucht waere, den haette mr au no e bootstour choenne mache und alligatore vo noecher gseh. normalerwis heigis doert au sehr vill guertetier, mir hei aber leider keis entdeckt. derfuer bin ich trotz hoehenangscht vo eim holzturm via haengebrugg zum naechschte gloffe.

so isch dr tag doch raecht schnaell ummegsi, und mir si in es denny's go aesse. dasch so e typischs amerikanischs restaurant mit schwarz/wiss kariertem bode, so we me's uss de film kennt halt. s isch aber trotzdaem no raecht guet gsi. zum abschluss haemmer denn no dr jenn ihre brueder in ere starndbar in sarasota troffe. dae hett doert mit ere band e ufftritt gha - sehr glatti luett s das gsi.

d jenn muess morn huett leider schaffe, drum goneg mr doch nid nach busch gardens. ich muess nomol kontakt uffneh mit ihre, will si am naechschte samschtig au nid cha. ich glaub aber, dass i morn richtig key west fahr und denn naechscht wuche mol nach busch gardens gang. uff jede fall bin i jetzt am aendi vo mim latin und gang no bitz an dr starndpromenade vo tampa go velofahre. i lueg, aber, dass i do bald wider cha update!